Ushbu dastur muallifi Sardorxon Jahongir 1977-yil Toshkent shahrida tavallud topgan. Imom Buxoriy nomli Toshkent Islom instituti va Mirzo Ulug'bek nomidagi O'zbekiston Milliy universitetini tugallab, islomshunos va filolog mutaxassisligi bo'yicha bakalavr darajasini olgan. Dastlabki ilmiy faoliyatini O'zbekiston Milliy universitetida arab tilidan saboq berish bilan boshlagan. Shuningdek, Misr Arab respublikasi elchixonasi qoshidagi fan va ta'lim markazining o'quv bo'limida ham faoliyat olib borgan.
U nufuzli nashriyotlarda rahbar va muharrir lavozimlarida ishlab, mamlakatimizdagi ko'plab ilmiy-ma'rifiy kitoblar chop etilishida o'zining munosib hissasini qo'shgan. Ilmiy faoliyatini davom ettirish maqsadida bir qancha xorijiy davlatlarda malaka oshirgan. Jumladan, so'nggi o'n yil mobaynida Turkiya Respublikasida bo'lib, u yerdagi Kavkaz Davlat universitetining dinshunoslik fakultetida "Tafsirshunoslik" yo'nalishi bo'yicha magistr darajasini olgan va nomzodlik dissertatsiyasini yoqlagan.
Sardorxon Jahongir xorijda tashkil etilgan "Turkiston sayyidlari va eshonlari" xalqaro jamiyatining asoschisi va raisi hisoblanadi. Jamiyat hozirda dunyoning yigirmaga yaqin shajarashunoslikka doir tashkilotlari bilan o'zaro hamkorlik aloqalarini yo'lga qo'ygan.
Muallif xorijda bir qancha ilmiy-amaliy konferensiyalar tashkilotchisi va qatnashchisi hisoblanadi. Uning muallifligida chet ellarda ko'plab ilmiy maqolalar va kitoblar nashr qilingan.
Sardorxon Jahongir tarjimasi ostida mamlakatimizda ilk bora nashr qilingan "Qur'oni Karim ma'nolarining so'zma-so'z tarjimasi" kitobi islomshunoslik borasida fundamental ishlardan biri bo'lib, qisqa muddat ichida ilm ahli orasida e'tibor qozondi.
Islomshunoslik fanlari bo'yicha PhD doktori, tilshunos olim Sardorxon Jahongir arab, fors, ingliz, rus va turk tillarini mukammal bilganligi bois ushbu tillardan milliy va xorijiy sertifikatlarga ega bo'ldi. Ayni damda u O'zbekiston Islom sivilizatsiyasi markazining mustaqil tadqiqotchisi va respublikamizdagi "Turon" o'quv markazi tarmoqlarining ta'sischisi va rahbari bo'lib, u yerda tinglovchilarga chet tillaridan saboq berib kelmoqda.
Maqsadimiz
Milliy qadriyatlarimiz hamda ma'naviy boy merosimizni tiklash va ularni puxta o'rganish, uning mazmun-mohiyati va ahamiyatini xalqimiz o'rtasida targ'ib etish, ajdodlarimiz bo'lgan Imom Buxoriy, Termiziy, Nasafiy va Zamaxshariy singari ulamolar izidan borish, ulardan bizlarga meros bo'lib kelayotgan va saqlanayotgan tarixiy hamda nodir qo'lyozmalarni avlodlarga yetkazish, ajdodlarimiz hayoti, axloqi va yuksak ma'naviyatini ifodalovchi matnlarni xalqimizga yetkazib, yoshlarimiz qalbida ular qoldirgan merosga ehtirom, izzat va muhabbat tuyg'usini shakllantirishdir.
